Berlusconi o'l regresu de La Mula Francis

Milio Mariño

N’abril de 2013 celébrense eleiciones, n’Italia, y Berlusconi yá tá cola pia tiesa. Yá tá como un chaval, de 76 años, anunciando que volverá a presentase porque son milenta los que-y piden que salve a Italia.

Berlusconi camienta que la situación ye muncho más grave que va un añu, cuando dexó'l Gobiernu por sentíu de la responsabilidá y amor a la patria. Calcula qu'hai un millón más de paraos, que la delda aumenta, el poder adquisitivu esbarrúmbase y la presión fiscal algama niveles insoportables. De mou que viendo como ta'l país, fierve-y la sangre. Diz qu'un patriota, como él, nun pue consentilo.

Lo que nun diz Selvinu ye que por nada del mundu quixera quedar fora de les instituciones, y a teya vana los xueces, cuando tien pendientes dellos casos xudiciales y ente ellos unu por presunta inducción a la prostitución de menores.

Los italianos conócenlo de sobra, pero seguro que tendrá munchos votantes. Dellos convencíos, otros por fastidiar y unos pocos por un casu paecíu a lo qu'asocedió na Cuenca Minera, en noviembre de 1957, cuando'l Sindicatu Vertical convocó eleiciones a Xuráu d'empresa.

Naquella ocasión, los mineros axuntáronse nun chigre y, depués de discutilo abondo, alcordaron votar a La Mula Francis.

Llegaron a esa conclusión porque, entós, tantu daba votar a unu qu'a otru… Lo malo qu'agora, 55 años después, venimos tar, más o menos, lo mesmo.