Multen a cuatro por llamar a Wert lo que, casi, toos-y llamamos

Milio Mariño

Si daquién creyía que nel cargu de ministru diba incluyíu qu'un ciudadanu pudiera desafogase llamándolo cualquier cosa que sepa que pue caye-y una multa de 90 euros, que foi lo que-yos cayó a los cuatro que llamaron a Wert fíu de puta, amás de lladrón y chorizu, cuando'l pasáu mes de xunetu visitó la Universidá Menéndez Pelayo.

Los acusaos alegaron, nel so favor, que los insultos nun diben dirixíos a la persona, sinón al cargu, pero nin esi argumentu, nin la llibertá d'espresión, remanada pola abogada, convencieron al xuez, que condenó a los cuatro a pagar la multa que diximos enantes.

La condena ye, de toes toes, inxusta pos una sentencia en firme de l'Audiencia de Las Palmas, fechada en xineru de 2007, absolvió d'una falta de vexaciones a un vecín de Telde que llamó fíu de puta a otru nuna engarradiella.

Apuntase nesa sentencia que: “expresiones como hijo de puta están tan integradas en nuestro vocabulario que a veces ni siquiera se consideran insultos, no llegando a constituir su empleo una vejación injusta, sino más bien la evidencia de una mala conducta o un comportamiento maleducado”.

Polo visto, el Xuez de Santander nun quier saber de xurisprudencia nin tampoco que'l Ministru Wert crezse colos insultos, tresformándose en toru bravu y presumiendo de qu'asina ye como-y presta dirixir el ministeriu.