Díaz Ferrán, otru illustre sinvergüenza

Milio Mariño

Dientro la llarga nómina d’illustres sinvergüences destaca, por méritos propios, el que fuere presidente de la CEOE, Gerardo Díaz Ferrán, persona de verbu fácil y autor de frases tan célebres como: “Esperanza Aguirre ye coyonuda”, “Yo nun escoyería Air Comet (la so compañía) pa volar" o, “Hai que trabayar más y cobrar menos".

Díaz Ferrán foi deteníu ayer, acusáu d'esviar a Suiza 4,9 millones d'euros y de llamase andana, a la hora de facer efeutiva la delda contrayía: 45 millones d'euros.

La Unidá de Delincuencia Económica y Fiscal, qu'intenta alcontrar el patrimoniu del empresariu en paraísos fiscales como Liechtenstein, Suiza, Irlanda, Xipre, Panamá y Colombia, yá emitió, el pasáu 5 de xunu, un autu nel qu'ordenaba'l bloquéu del so yate, atracáu nel puertu de Barcelona y valoráu en 5 millones d'euros, pa evitar que lo treslladare fuera del territoriu de la Unión Europea.

Esti empresariu modelu donó 246.200 euros al PP madrilanu, por mediu de Fundescam, a pesar de que la llei prohibe les donaciones d'empresarios con contratos públicos. Estremu que conocía'l PP, de sobra, pero punxo’l cazu y miró pa otru llau.

Ye d’esperar que con Díaz Ferrán nun asoceda lo mesmo que col chinu Gao Ping. Que’l xuez nun s’enquivoque y qu'esti pollu nun pase'l ponte de la Constitución na cárcel y pa navidaes yá lo tengamos de vuelta nel xalé, bebiendo sidra xampán El Gaiteru y diciendo qu’hai que trabayar más y cobrar menos.