Anque'l mundu nun s'acabe, esto acabóse

Milio Mariño

Nestos díes de comilones, en cuantu que llego a los postres, camiento-yos a los amigos qu'esto acabóse. Debo resultar pesáu pero seguramente por qué m'aprecien, o por otra cosa peor, a la fin, danme la razón.

Camiento qu'esto acabóse non por qué pasao mañana s'acabe'l mundu sinón porque s'acabó lo que se daba. Esti modelu yá dio de si lo que tenía que dar y como vien siendo vezu, al entamu los sieglos (XIX y XX), socederá daqué nuevu y distintu que los de la mio edá, casi seguro, nun vamos ver, pero va tiempu se cuez.

Va tiempu se cuez anque nós, los sesentonos y d'ehí pa embaxo hasta casi los trentañeros, lo que pretendemos nun ye camudar lo qu'hai sinón detener el tiempu y volver a un pasáu nel que vivimos meyor. Quiero dicir, que nos garanticen que la vida volverá ser como antes, anque sabemos, de sobra, que la vida nun tien vuelta de fueya. Qué podrá ser meyor o peor pero que nun volverá a ser igual.

Eso sí, por un tiempu vamos siguir falando de drecha ya esquierda porque les nueses mentes precisen sabese nun llau o n’otru pero yá reconocemos que nin unos nin otros nos representen y que los partíos, tal como güei los conocemos, tan acabaos.