Equí va haber sangre, glayó una víctima d'esa estafa bancaria que conocemos como les preferentes. Y, por si daquién creyía que’l glayíu nun diba en serio, otra víctima, que taba a la vera, alcordó qu'acababen d'apuñalar al direutor d'una sucursal bancaria nes Ríes Baxes.
La desesperación de la xente, ante la crítica situación de desamparu social y l'actitú de los políticos, cuyu raseru, al respeutive de los poderosos y los humildes, ye lo contrario de lo que debería ser, tá llegando al puntu de provocar reacciones instintives qu'esixen el castigu inmediatu de los corruptos, los estafadores, los causantes de la ruina y tola reciella que los ampara.
Lo correuto sería dicir que condergo la violencia, venga d'aú venga, pero'l corazón y la cabeza dícenme qu'ensin violencia, diendo de bonos y mansulinos, siguiríamos con una cadena al pescuezu y trabayando d'esclavos pola comida.
Fai yá nin se sabe qu'intenten convencenos de que la violencia ye, toa, lo mesmo. Y eso nun ye ciertu. Nun ye lo mesmo la violencia del verdugu que la emplegada pola víctima en defensa de si mesma. Por supuestu que non lu ye.
No hay comentarios:
Publicar un comentario
Milio Mariño