Rajoy nun gobierna, véngase de nos.

Milio Mariño

Desque morriera'l dictador, nunca nun añu, nin en cinco, España reculó tantu nin tuvo en peor situación. Nunca, como agora, tuvimos l’aquello de que tábemos gobernaos por daquién que diba contra nós. Daquién que tenía dalguna cuenta pendiente y la taba cobrando.

Esi daquién ye Rajoy, una persona qu'enxamás paeció dotada pa la política y menos pa ser un líder. Nunca lo quixo la xente nin entusiasmó lo más mínimo. Claro que, a eso, tamién ayudó’l PP, que lu trataba como a un pelele. Como a ún d'esos neños que dan repelús y al que naide quier como amigu, nin nel so equipu. El primeru Aznar, que-y solmenaba y sigue solmenando-y pescozaes, porque ye quien meyor lu conoz y sabe que ye incapaz. Nunca se fió de los sos silencios, la so disposición a tragar y callar, y la so actitú falsa y cínica.

Rajoy ye un mediocre que llegó onde nun imaxinaba. Y los mediocres, cuando trunfen y lleguen a lo más altu, avecen a ser ruinos y vengatibles. Esta ye la so venganza. Nótase-y nesi esbozu de sorrisa que se-y escapa y nun pue azorronar.

¿Alcordáis cuando vos ríais de min? Paez dicir dempués que-y entruguen por cualesquier d’eses lleis y midíes que denguna ye al nuesu favor, toes nos perxudiquen a cuál más.