Non mos queda otra qu’acabar col franquismu

Milio Mariño

Toi mui d’alcuerdo col analís que fai Luis García Montero cuando diz que la debilidá de la democracia española, y la descomanal factura que tamos pagando, débense a que la nuesa transición democrática, lloñe de ser una ruptura col pasáu, supunxo'l zarru en falsu del franquismu.

Creo, sinceramente, que tou vien d'ehí. Que l’ablúcante corrupción empresarial y política que tamos viviendo bien ser la herencia d'aquel vieyu conceutu de qu'España ye un cortixu, nel que manden los señoritos y al restu tocanos callar y sufrir, que para eso nacimos.

La drecha española inda nun asumió que vivimos en democracia. Nun pasa’l corte, nun ye homologable cola drecha europea. La drecha y la mayoría de los empresarios que, más que'l razonable beneficiu, lo que persiguen ye ganar dineru a embute, como seya y a mui curtiu plazu.

Lo malo que con ser tou esto vergónzante y bochornosu, entovía tien más delitu que los políticos, inclusu los d'esquierdes, atesteren en que la democracia ye un regalu del Rei y los escasos drechos sociales que tenemos son un luxu que, los probes, nun podemos permitinos.

Por eso que non mos queda otra qu’acabar col franquismu. Non lo ficimos cuando teníemos que facelo, y agora la cosa preséntase asina: o nós o ellos.