¿Sedrá Merkel fía de Hitler?

Milio Mariño

Pensaréis que son imaxinaciones míes pero podéis pensar lo que vos de pola gana. Según un dossier, que conoz poca xente y de vosotros depende que non lo conoza un cientu, Angela Merkel, nacía n'Alemaña del Este, sedría frutu d'un esperimentu xenéticu del Doutor Carl Clauberg, que tuvo al serviciu de la Unión Soviética y xuntó, por encargu, l’espelma conxeláu d'Adolf Hitler colos óvulos d'una hermana d'Eva Braun, la que fuere novia del dictador alemán.

Los archivos desclasificaos de la Stasi (policía secreta d'Alemaña del Este), revelaron que los soviéticos (supónse que d’alcuerdo con Rockefeller y la Trilateral) tuvieron interesaos en crear un retruque de Hitler coles mires de ponelo al mandu d'un Superestáu Européu. Esi fechu namás podría dase dempués de qu'un alemán ocupara'l tronu del Vaticanu, cosa qu'asocedió cuando Joseph Ratzinger ocupó'l llugar de San Pedru, el 20 d'abril de 2005.

Poco dempués, el 22 de payares del mesmu añu, la supuesta fía de Hitler llegaría al poder, ocupando'l máximu cargu, el de Canciller alemán, fechu pal que foi concebía en 1954. D'esta manera, al xuntar la direición d'Europa, col G-8 y el Vaticanu, la sociedá secreta Iluminati, que domina’l mundo, consiguiría'l so enfotu.