El PSOE nun pue siguir per esi camín

Milio Mariño

Mal anda'l PSOE, y non pol casu de Ponferrada, que tamién, sinón porque n'apenes un mes tuvo tres encontronazos (Cataluña, Galicia y Llión) que vienen demostrar lo que yá sabíemos, que la executiva actual ye de transición y que ta por facer lo que nun ficieron nel últimu congresu, una reestructuración dafechu y un relevu xeneracional.

Rubalcaba, nun se discute la so valía, pero güei ye un políticu amortizáu y amordazáu pola so pertenencia a un Gobiernu que perdió les elecciones de forma estrueldosa. Óscar López y Elena Valencianu nun dan la talla, nun respuenden a lo que ye d’esperar na organización y proyección del partíu. El restu la executiva entovía menos, tienen un perfil cercanu a lo que sedría una executiva rexonal. Asina les coses la entruga ye a qu'esperen los socialistes pa llevar a cabu lo que, necesariamente, tienen que facer. Siguir empantanaos llambiéndose les firíes ye malu pa ellos y pal país. Son tantos y tan grandes los desmanes del PP qu'ensin una oposición fuerte, organizada y coles idees clares, la sensación de fadiu y desamparu va aumentar hasta la desesperación.

La renovación del PSOE, non solo ye necesaria pal partíu, ye imprescindible pal país.