La llei de lo que val un peine

Milio Mariño

Yá ven lo que son les coses, el gobiernu de Corea del Norte, suponemos que p'atayar la crisis, decretó una nueva llei que llinda los cortes de pelo y los peinaos de la xente y va sirvir de complementu a otra que yá imponía la obligación de vistise d’acordies colos modelos establecíos.

Nesti casu establez un máximu de 18 cortes de pelo, y peinaos, al añu, pa les muyeres y ye más restrictiva colos homes, que solo van poder cortalo diez veces y llucir diez peinaos, toos ellos en base a un pelu de non más de cinco centímetros de llargu, con raya o ensin raya, pero nunca asonsañando l'estilu que lleva'l so líder Kim Jong Un, porque ési ta acutáu puramente pa él.

Toles peluqueríes norcoreanes tienen yá'l so catálogu homologáu d'estilos y tou aquel que s'atreva a probar unu distintu pue ser acreedor d’un arrestu y ser obligáu a cortar el pelu como manda'l gobiernu.

Estes midíes prueben, una vegada más, lo burros que son los gobiernos comunistes. Ciertu qu’estos recortes afeuten menos que los nuestros de sanidá o educación, pero equí, n'España, ensin necesidá de llei o decretu dalgunu, la xente vístese en base a trés modelos: Modelu Primark, Modelu Zara y Modelu Cristian Dior con complementos de Loewe.