Por aprovechar les oportunidaes llámenlu castrón

Milio Mariño

Bárcenas, que namás fala col gatu al qu'intentaben llevalo a l'agua y agora ponen-y un cascabel, dixo, nuna entrevista, que cuando él yera xoven, y yo tamién, tol mundu tuvo les sos oportunidaes pa ganar dineru y facese ricu. Que nun había trucu, que bastaba con ser entamador y aprovechar la oportunidá.

El mui Castrón, asina ye como lo llamen los amigos y compañeros de partíu, fala de la dómina aquella en que Solchaga aseguraba qu'España yera'l país onde cualesquiera podía arriquecese más fácilmente.

El casu que dempués de Solchaga vieno Aznar y lo de facese rico foi, inda, más fácil, asina ye que los que fuimos, y somos, fatos mui fatos, nun deberíemos quexanos. Nun supimos, o nun quiximos, aprovechar les oportunidaes. Él, el mui castrón, supo aprovechales toes, les suyes y les nueses y, el resultáu, ehí lo tienen, 38 millones en Suiza y nós cola cartiya d’aforros que paez un ticket de compra del Alimerka.

Agora que dígovos una cosa, tamién lo ta sufriendo. Acaba de confesar que naide sabe lo que se sufre tando en boca de toos, que ye un calvariu tener a la prensa, día tres día, a la puerta casa.