Pa Núñez Feijóo, morrer na sala d'espera d'un hospital ye un fechu puntual

Milio Mariño

Na madrugada del martes al miércoles una muyer de 81 años morrió na sala d'espera del serviciu d'urxencies del Complexu Hospitalariu de Vigo, mientres esperaba recibir atención médica. La muyer, que nun llegara a entrar nun box, llevaba esperando cerca de tres hores.

En Galicia, Madrid y Cataluña, onde gobierna'l PP o la drecha, la situación nes urxencies de los hospitales ye cada vez más insostenible. El pasáu mes de febreru los trabayadores del Hospital d'A Coruña clamaben contra los retayos porque, según dixeron, había díes qu'al empecipiar la xornada, a les ocho la mañana, teníen 66 pacientes esperando dende diba hores a tener cama.

Claro que tou eso, según el presidente de la Xunta, Núñez Feijóo, nun tien que ver colos retayos na sanidá pública. Foi lo que dixo mientres pidía esculpes pola situación de les urxencies. Dixo que nun había por qué sollertase pos tratábase d'un problema puntual. Una esplicación que, de xuru, va sirvir de consuelu pa los fíos y familiares de la señora de 81 años que finó nuna siella, esperando por una cama.

Tantu yos da la salú de la xente o que muerra cualquiera, lo importante ye’l déficit y que los Bancos nun quiebren.