El robu, consentíu, de les preferentes

Milio Mariño

Creíamos que namás pasaba en Xipre pero, n'España, miles de pequeños aforradores que colocaron los sos aforros creyendo que lo facíen a plazu fixu van perder ente'l 10 y el 70 per cientu de lo invertío y otros, los de Bankia, van perdelo práuticamente tou ensin que'l Gobiernu faiga nada por desquitalos de lo que ye un robu consentíu. Al contrariu, dexa que los Bancos a los que financió con miles de millones de dineru público peracaben la estafa y que los estafadores non solo salgan impunes sinón qu'esfruten de los millones que s'asignaron como indemnización.

Calculen qu'hai más de 700.000 persones afeutaes y que'l monto total de la estafa averase a los 20.000 millones. El Gobiernu del PP ye, agora, el máximu responsable pero tamién tienen so responsabilidá, y non poca, el restu de los partíos políticos. Toos peracabaron el robu y toos piden xaciu y cordura a los que protesten contra los lladrones y sobremanera, contra los que los tapen.

Choca de too esto que plasmemos colo Xipre cuando tenemos en casa los desahucios y les preferentes. Nun ye solo Bárcenas, hai munchos Bárcenas faciéndonos la peineta y riéndose nes nueses ñarices.