El Vaticanu yá ta cola esquierda a vueltes

Milio Mariño

El Papa acaba d'estrenase y el Vaticanu denuncia una campaña difamatoria, d'elementos anticlericales d'esquierda, pa difamar a la ilesia. Mal entama'l representante de dios na tierra. Dicen los sos ayudantes que la campaña contra Bergoglio sofitase en fechos qu'asocedieron fai yá munchos años, que nun foron probaos y que contienen una fuerte carga ideolóxica.

La realidá paez dicir otra cosa. Quiciabes nun se tengan prebes de lo que fixo pero si se tienen de que, l'agora Papa Francisco, non solo nun s'opunxo al Golpe d'Estáu del Xeneral Videla, del que la próxima selmana van cumplise 37 años, sinón qu'hai testimonios gráficos nos qu'apaez dando la comunión al triunviratu d'asesinos, Videla, Masera y Orlando, qu'executaron a miles d'arxentinos y fixeron desapaecer a otros tantos.

Fai nada, en 2010, Bergoglio invocó, por dos veces, el so drechu, según la llei arxentina, de negase a comparecer ante un tribunal. Cuando finalmente lo fixo, l'abogada de drechos humanos Myriam Bregman dixo que respondió con esculpes y con evasives.

Mialma va ser verdá que Francisco sabia de lo que falaba cuando, al día siguiente de ser escoyíu, díxo-yos a los Cardenales: Que Dios vos perdone polo que fixistis.