Nun son humanos, quiten el dineru de los tresplantes

Milio Mariño

Cataluña, Andalucía, Estremadura, Valencia y Canaries nun van recibir del Gobiernu nenguna partida económica destinada a sanidá, educación y servicios sociales por nun tar al día nel pagu de la Seguridá Social y non cumplir colos oxetivos del déficit. Los médicos d'estes comunidaes tampoco van recibir fondos estatales pa la formación en donaciones y tresplantes, una materia na qu'España ye líder mundial dende va décades.

La noticia saltó nel senu d'una xunta que los responsables autonómicos de tresplantes caltuvieron nel Ministeriu de Sanidá.

Soivos sinceru, taba lleéndolo y costábame créelo, pero asina ye como reza nun documentu facilitáu pol Ministeriu. Depués, cuando los periodistes apertaron a Montoro, llantándo-y delantre'l micrófonu, reconoció que’l documentu diz eso pero que yera matizable, que quiciás nun fuere inmediatu.

Mialma que debo de tar volviéndome maxareta porque la primer reacción, el primer impulsu, al lleer esa animalada, foi que yá ta bien de facer tontu protestando de forma pacífica y civilizada. Lo que nos queda, la única salida, ye ser, polo menos, la metá de xabaces qu'ellos.