La profesora de relixión da clases de masoquismu

Milio Mariño

La campaña qu’empecipiaren les Nueves Xeneraciones del PP de Castellón, sofitada y xaleada pol PP madrilanu, na que s'encamienta a los alumnos a denunciar de forma anónima a los profesores qu'adoctrinen nes aules, empieza a dar resultáu.

Vaya que si lo da. Lo malo, pa la derechona ye que ye xustu al aviesu de lo que pensaben porque alumnos de la Universidá Católica Cardenal Herrera de Valencia denunciaron a la profesora de Doctrina Social de la Ilesia, Gloria Casanova, por dicir nuna clase de terceru de periodismu coses como: “Anque'l to home te sía infiel, la verdadera preba d'amor ye siguir amándolu con llárimes nos güeyos, como Xesús lloraba na cruz". “Les muyeres maltrataes nun se tienen que separar porque eso ye amor". Y, "l'albuertu en casu de violación nun ye tolerable porque dientro de lo tarrecible de la violación saques daqué bonu, que ye un fíu, un don de Dios".

Cuando los periodistes entrugaron la opinión del Rector, dixo qu’entá non lu vía claro, que diba tener qu'analizar, a fondu, l'asuntu enantes de facer una valoración.