Fumata como la conciencia de dellos Cardenales

Milio Mariño

Munchos de los que criticaron, con razón, que'l PSOE de Ponferrada s’apoyare nos votos d'un acosador sexual, nun veo que pongan el mesmu énfasis nun asuntu que non m'incumbe, porque nun soi católicu, pero que considero muncho más grave: que na elección del Papa participen doce cardenales que defendieron, taparon o fueron cómplices de cures pederastes y pedófilos.

Doce que sepamos… Y, ente los que sabemos ta, na menos, que'l Camarlengo, Tarcisio Bertone, secretariu d'Estáu de Benedicto XVI, qu'afirmó, nel so día, qu'a un obispu nun se-y pue esixir que denuncie a un sacerdote acusáu d'abusu sexual, porque "si un sacerdote nun pue confiar nel so obispu, por mieu a ser denunciáu, significaría que nun hai llibertá de conciencia".

Vaya como piensa so illustrísima, reverendísima. La Tercer Persona de la Santísima Trinidá, esto ye, l'Espíritu Santu, mialma que lo tien crudu pa escoyer a daquién medianamente decente. Tantu que nun fadría falta añidir pez (ye lo que faen) pa que, al quemar de les papeletes, salga fumu negro. Si les papeletes fueren el resultáu de la conciencia de los votantes esi, el negru, sedría, siempre, el color.