Día de la muyer… Y del home

Milio Mariño

Reconociendo que la discriminación positiva, y la Llei d’Igualdá, anque nun me gustaren enforma, foron necesaries y contribuyeron a que les muyeres ocuparen puestos que, si nun fuere asina, non los ocuparíen, confieso que soi críticu con esti tipu de celebraciones. Con estu del día de tal o cuál.

¿Por qué? Pos, nesti casu, porque'l día de la Muyer trabayadora tuvo'l so orixe na reconocencia de que les muyeres yeren capaces de realizar les mesmes xeres que los homes. Nun foi una reconocencia a toles muyeres, y al so trabayu, sinón a les que trabayaben fora de casa. Y eso, a la mio manera de ver, nun ye xustu.

Tengo entendíu qu’agora camudaron lo de Muyer trabayadora por Día Internacional de la Muyer y, a esti respeuto, seguru que soi mui antiguo, pero soi de los que piensen que la conciencia de clase abarcalo too, incluyía la conciencia de xéneru. Dígolo porque nestos tiempos de crisis, acentúase más entovía la desigualdá y la presión sobre la clase de tropa, sobre los trabayadores: sían homes o muyeres, y trabayen onde trabayen. Unu sigue siendo marxista, anque un te de moda.