¿Falamos, daveres, de lo qu’importa?

Milio Mariño

¿De qué fala la xente? Lo normal, lo lóxicu, sedría que falara de los seis millones de paraos, de los desaucios, de la brutal cayida del consumu, de les protestes ciudadanes, de cómo ta afeutando a los más débiles el copagu sanitariu, de los que se quiten la vida porque nun puen soportalo, de los 30.000 millones d'euros, casi tantu como'l rescate a la banca, qu'estafaron los bancos a los que teníen preferentes, de lo que va cayer la esperanza de vida por culpa de los retayos sanitarios, de les privatizaciones…

De too eso falamos poco, de lo que más falamos ye de Bárcenas, de Corinna, del Rei, d'Urdangarín, del nuevu Papa… de Mortadelo-3, axencia de deteutives…

Yá sé que caún fala de lo que quier, pero tengo una entruga que nun apara de dame vueltes. ¿Tarán ayudándonos? ¿Tarán empobinándonos pa que falemos más d'eses coses y menos de lo que, daveres, importa? ¿Tentarán distrayenos pa que la indignación quede en nada?

Los casos de corrupción son bien graves pero, ensin escaecelos, igual nos diba meyor que faláremos de lo que ta pasando coles nueses vides. Que falemos, cada vez, menos d’eso, quiero creer que nun significa que lo aceptamos.