Plasma la reciella d’asesores a sueldu

Milio Mariño

Cuerren malos tiempos, tamién, pa los funcionarios y eso esplica que dellos emplegaos públicos, cabriaos pol aumentu de xornada, dieren a conocer que la corporación madrilana tien 254 asesores a sueldu.

Gracies a esa fonte sabemos que 203 son del PP, 31 del PSOE, 16 d'IU y 4 d'UPyD. Y qu'ente ellos tán una hermana d'Esperanza Aguirre, el famosu Carromero y un bon númberu de parientes, hermanos, hermanes, cuñaos y demás familia, de senadores y diputaos, con sueldos que bazcuyen ente los 40.000 y los 50.000 euros, lo cuál supón, de gasto, 12 millones al añu.

Na información qu'apurren los descontentos, aseguren qu'una bona parte d’esos asesores nun tien horariu d'entrada nin de salida y qu'otros, bastantes, nun pisen l’Ayuntamientu. Imaxino qu'asesorarán dende casa, como Sepúlveda. El casu que vistos los resultaos, una de dos: o los políticos nun yos faen casu o asesoren que dan dolor.

Mialma ye cansinu tar, siempre, col mesmu cantar pero nun hai otra. Dixeron que diben recortar gastos y, nel Ayuntamientu de Madrid, pasaron de 311 asesores en 2011 a 254 en 2012. Claro que, a lo peor, nun ye, solu, en Madrid, si conociéremos el númberu d'asesores que tienen los nuesos conceyos tamién quedábemos plasmaos.