L'home llobu yera muyer y llamábase Manuela

Milio Mariño

Descúbrese agora que Manuel Blanco Romasanta, l'home llobu gallegu, el sacamanteques, cosía, bordaba, calcetiaba y cortaba traxes y vistíos. En realidá yera Manuela, un ser duce y entrañable, d'apenes un metro cuarenta, que diba de feria en feria vendiendo beberaxos y ungüentos. Al paecer tenía "cara de bonu". Naciera en Regueiro, una aldega d'Esgos, Ourense, en 1853, y salvóse del garrote llaín tres un procesu xudicial ensin precedentes, financiáu por Isabel II que, a la fin, indultólu camudandoi la pena de muerte por cadena perpetua.

Romasanta foi xulgáu por, namás, 9 crímenes de los 17 que se-y atribúin, nun xuiciu que duró un añu y nel que declaró ser víctima del sortilexio d'una bruxa que, según él, facía-y tresformase en llobu mientres les nueches de lluna yen.

La teoría de que Manuel Romasanta yera una muyer, col clítoris xorrecíu, foi espuesta nes xornaes que, sobre esta tema, se celebren en Allariz, al cargu de la Fundación Risco, y vien a concidir colo yá apuntao, va tres años, por Xosé Ramón Mariño, antropólogu de la Universidá de Santiago.

Tráigolo equí porque paezme que, de xemes en cuando, vien bien apurrir una hestoria que ponga al descubiertu que vivimos nel vezu de creer que lo vimos tou y, perembargu, sosprendémosnos cola delicia de que nun vamos, nunca, a dexar de sosprendenos.