Dimisión, güei mesmu, de los Diputaos del iPad perdíu

Milio Mariño

El Congresu los Diputaos tenía 30 iPad en reserva per si sos señoríes tresmanaben dalgunu y el resultáu foi qu'en 9 meses tresmanaron 50. Son tan propensos al descuidu que na menos qu'el 14 % perdió l'iPad que-y dieren de baldre.

Pero nun pasó nada, como había 30 nel ñeru, diéron-yos otru nuevu y tan contentos. Lo malu que nun algamó pa toos, quedaron 20 n’espera de qu’echaren mano al presupuesto y autorizaren una nueva compra. Y la cosa plonió per ehí, polos que quedaron compuestos y ensin tabletina de gorra.

Probinos, van tener que mercar otru o pidi-ylo al fíu, la señora o quien fuere al que-y fixeren el regalín porque esi porcentaxe d'iPad perdíos nun lo cree nin Santa Rita de Casia que ye la santa de lo imposible.

Siempre me punxeron enfermu los aprovechaos y los gorrones. Cáenme peor que los que roben. Por eso sedría de xusticia que facilitaren los nomes de los 50 Diputaos y Diputaes que dixeron que perdieren el iPad y pidieron otru a cambéu. Creo que nun merecen nin puen representar a naide. Tendríen que dimitir yá mesmu.