Camentando la dimisión del direutor de la CIA

Milio Mariño

Vaya per delantre qu'a min que dimita, o non, el direutor de la CIA tantu me da que me da lo mesmu. Dichu esto paso a lo siguiente, a que nun pueu aguantar un ruxe rux que tengo equí dientro.

Nun pueu porque'l xeneral, hasta agora xefe de la CIA, David Petraeus escribió-y una carta a Obama na que-y dicía que tuviere casáu 37 años y que, al sei infiel a la so pareya, amosaba un criteriu mui probe y un comportamientu inaceptable como maríu y como líder d'una organización de les carauterístiques de la CIA.

Como maríu toi d’alcuerdo, pero como xefe de la CIA… Vaya morru. Yá quixeren los iraquíes y sabe dios cuanta xente nel mundu que'l to mayor comportamientu inaceptable fuere'l de ponéi los cuernos a la to muyer.

Pero igual toi enquivocáu, igual les detenciones illegales, los secuestros, les tortures, los asesinatos y tou lo que se-y atribúi a la CIA ye mentira y la Central d'Intelixencia Americana, a lo que, daveres, se dedica, ye a la filantropía y el desenvolvimientu de la cultura y les llibertaes.

Barrunto que debe ser eso porque Obama aceutó la renuncia y dixo que los sos pensamientos y les sos oraciones sedríen pa Dave y la so muyer Holly, que tanto fixeren p'ayudar a los Estaos Xuníos y a les families de los militares.