Si quieren pueden: en dos hores solventaron los desahucios

Milio Mariño

Dos hores, lo que dura una película o un partíu de fútbol, tardaron sos señoríes n'arreglar un drama social vergonzosu qu'amás de dexar na cai a miles de families, costó cientos de manifestaciones, palices de los antidisturbios , firíos y hasta la vida de los qu'enantes d'abellugase embaxo d'un puente escoyeron la muerte.

Falta saber, entovía, cómo van reformar esa llei, anguaño vixente, que data de 1909, pero, a la espera de que nun seya otra chapuza como aquello del códigu de bones práutiques, quédome col detalle de lo que dixeron dambos partíos: solventámoslu en dos hores.

Vergüenza debía da-yos qué, daqué que pue resolvese en dos hores, tuviera qu'esperar años y años y supunxera la desesperación y la ruina de tantes y tantes families.

Penriba de que presumieren de lo que nun debíen presumir demostraron lo que barruntábemos: que ye custión de voluntá, que si quieren pueden. Eso ta claro, asina que yá tan tardando en emplegar otres dos horines, o trés si fai falta, pa solventar lo qu'acaba dicir la Unión Europea. Que, de los 27 países que la formen, namás Letonia y Lituania superen la desigualdá social qu'hai n'España.