El Plasma de Pilar Sol y la España del BBVA

Milio Mariño

La diputada del PP valencianu, Pilar Sol, dixo ayer qu'había families que taben en situación de necesidá y que, a lo meyor, utilizaben los 400 euros de l'ayuda social pa mercar una televisión de plasma.

Nun sé si al empar, enantes o depues, el Presidente de BBVA, Francisco González, dixo, a so vez, qu'España ta muncho meyor de lo que diz la prensa y de lo que la xente cree.

Oyíu lo que dixeron los dos tengo una dulda que me roye por dientro. Nun sé si la diputada del PP s’atrevió a dicir lo que dixo porque enantes oyó falar al banqueru o si resulta que'l banqueru faló asina porque oyó dicir a la diputada que los probes merquen teles de plasma coles ayudes sociales.

En principiu pensé que debió ser el Banqueru, el qu'oyó a la diputada, d’ehí que dixera qu'España ta meyor de lo que la xente cree, pero depués camudé d'opinión y diome por pensar que la diputada nun diría lo de les teles de plasma si nun fuera qu’oyó dicir al Banqueru qu’España ta meyor de lo que barruntamos.

Duelme la mollera de les munches vueltes que-y di, pero como entá nun lo tengo claro agradezo cualquier opinión al respeuto que me quite esti pesu d’enriba.