Los Bancos pasen del lladriyu al hospital pero non pa curase, pa siguir estafando

Milio Mariño

La estafa nacional non solu sigue creciendo sinón que los estafadores tán cada vez más crecíos y actuen a cara descubierta, con total impunidá.

Ribera Salú, una empresa valenciana controlada por Bankia, ye la principal candidata pa llograr la concesión d’unu de los seis hospitales que la Comunidá de Madrid piensa privatizar poniéndolos en manes d'empreses de “reconocía solvencia” como s'encargó d’afitar el Conseyeru de Salú cuando esplicó'l nuevu modelu sanitariu.

Desinflada la borboya del lladriyu hai que buscar nuevos choyos. Y, el negociu de la sanidá nun ye una tontura, basta ver les cifres que manexen, lo que ta pagando Madrid a la multinacional Capio Sanidá, que xestiona los hospitales de Móstoles, Valdemoro y Collado Villalba. Na menos qu’a razón de 571 euros per añu y habitante. Ye dicir que si tenemos en cuenta qu'un Hospital pequeñu atiende un área, mínimu, de 135.000 habitantes ye fácil echar la cuenta. Eso lo qu’ingresen, como lluéu atiendan a los enfermos ye otru cantar.

Empreses de reconocía solvencia diz el Conseyeru. Y apunta pa Bankia. La tema ye que yá nin se corten, asina que nun sé hasta ónde nin hasta cuándo vamos siguir aguantando ensin que s'arme la de coyer.