La web del Senáu y el preciu les castañes

Milio Mariño

Tá too mui caru. Basta ver qu'un cucuruchu de castañes cuesta tres euros (quinientes pesetes) y quinientos mil euros facer una páxina web pal Senáu. Nun sé onde vamos dir a parar. Yo, lo de les castañes, non me lo esplico. Quitando qu’hai que mozquetales un pocu malpenes tienen mano d’obra… Amás por nun gastar nun gasten nin en envolveles, dánteles en papel de periódicu.

No del mediu millón d’euros, (83 millones de pesetes) por facer una páxina web pal Senáu ehí yá non me meto. Esi ye otru cantar… Imaxino que llevará una pila hores de trabayu, obreros, ferramientes, andamios, que se yo… la de mi madre.

Nun pienso, tampoco, que puea haber trucu. Esplíquenlo bien esplicáu. La paxina web sal por 274.350 euros, el buscador por 115.404, el micrositiu infantil por 47.937, y nun sé qu'hestories más hasta redondiar el medio kilo.

Apaez too por escritu y bien detalláu pero acabo lleer qu'hai suspicacies, qu’hai xente mui indignada pol aquello de que gasten una pila perres nuna páxina web.

Mialma sal caru pero, qué queréis que vos diga, a min, paezme más desproporcionáu lo de les castañes. Lo que pasa que d’eso, nin los partíos d’izquierdes nin los sindicatos dicen nada.