La Xusticia va ponese al preciu del caviar beluga

Milio Mariño

L'ataque d’esti Gobiernu a los drechos fundamentales ye per tierra, mar y aire. Nun damos abasto a denunciar tropelíes. Agora toca-y a la Xusticia. Tamos tan ocupaos n’otros frentes qu'escapábasenos esti, pero la cosa nun ye cuentu risa.

Dicen munchos abogaos, y tamién munchos xueces, que’l proyeutu de Llei de Tases Xudiciales que prepara Gallardón va ser un atracu. Pa tener accesu a la xusticia civil o contenciosu-alministrativa tendrémos qu’apoquinar 1.200 euros, y cerca de 300 na llaboral, más otra cuantía variable que dependerá del dineru reclamáu en cada casu.

Ponen como exemplu qu'una persona que sufriere una lesión medular nun accidente de tráficu y recurriera hasta'l Tribunal Supremu, tendría qu'abonar 19.500 euros en conceutu de tases. "Llegaríemos al absurdu de que dalgunos recurrentes tuvieren que pidir un préstamu al bancu pa pleitiar", dixo un xuez.

Otru xuez, el decanu de Madrid, José Luis González Armengol, dixo tamién que nun se puen establecer tases que nun puean abonar la mayoría de los ciudadanos, porque eso sedría crear una xusticia pa ricos, y destaco qu'espera que nun se llegue a que los xueces tengan que plantear cuestiones d'inconstitucionalidá contra la futura Llei por vulneración del artículu 24 de la Constitución, que reconoz el drechu de tolos ciudadanos a llograr la tutela xudicial efeutiva de los tribunales.