Hasta agora, a los pensionistes diérennos plizcos pero como aguantamos ensin malpenes quexanos, anuncien mordigaños que de xuru van ser l’entamu d'una tayada mayor. Yá sabéis, les pensiones nun se van revalorizar según l'índiz del costu la vida, sinón que van aumentar o menguar en función de la situación económica del país. De mou que como’l país va mui bien, nun hai nada que temer.
Los qu'inda tais n'activu nun tenéis qu’esmolecevos tampoco, prepárenvos una bona vexez. Les vuestres pensiones van calculase, amás de cotizar munchos más años, n'atención a la esperanza de vida y non de lo que coticéis. Tamién van tener en cuenta, el patrimoniu que tengáis: a más patrimoniu, por pocu que sía, menos pensión.
Pero tranquilos, yá vais ver como dicen que si tuvieren mandando los roxos, la cosa sedría peor. Bonu si ye que queden roxos porque de sarxentu pa enriba desertaron toos, namás quedamos la clase de tropa. Asina que non me va quedar mas remediu que facer como mio güelu: xuntame con unos cuantos, tirame al monte y defendeme con dignidá.
No hay comentarios:
Publicar un comentario
Milio Mariño