Rajoy corniáu nun muslu

Milio Mariño

Sé qu'a munchos de vosotros nun vos gusten les corríes de toros, -a min tampoco- pero como lo que ta asocediendo, col PP, la corrupción y Aznar, convertióse na Fiesta Nacional, ocurrióseme tomar prestáu un titular y una semeya de la Feria de San Isidro, pal comentariu de güei.

Tamién valía aquella frase que-y dixo’l Rei a Hugo Chavez: ¿Por qué non te calles? Eso anden diciendo Rajoy y los ministros, en voz baxa, anque cuando-yos entruguen en públicu, allorien como pita llueza, nun saben qu’esculpa poner y, a la fin, dan la versión de qu'Aznar foi entrevistáu por Gloria Lomana, Francisco Marhuenda y Victoria Prego, trés periodistes d'estrema esquierda que con entrugues traicioneres llograron acorralalo y fixeron que cayera na trampa.

De toes formes, la cornada foi grave pero non mortal. Según el parte médicu, Rajoy resultó firíu, por asta d'Aznar, nel interior del muslu drecho y anque se reparen estrozos, nun sangra abondo. Ruempe venes superficiales, interesa la piel y el texíu celular. Lo cuál, dientro de la gravedá, ye bona señal.