El Conceyu de Madrid subvenciona una web de contactos

Milio Mariño

Los escritorinos, como un servidor, mialma plasmamos. Pensábemos que teníemos, anque namás fuera un plizcu d'imaxinación y la realidá ta demostrando que tenemos menos imaxinación qu'un grillu. Na vida se nos podía ocurrir qu'una web de contactos n'internet, recibiera del Conceyu de Madrid, nin de conceyu denguno, 42.500 euros de subvención.

La nuesa imaxinación, por muncho que la echemos a volar, nun llega ehí, nin algama a xustificar tamaña golfería diciendo qu'una Web qu'anuncia como actividá: lligar, tener amistá, sexu y amor, ye una micropyme innovadora que resulta vital pa collaborar nel cambéu de modelu económicu.

Pos bien, tou eso díxolo'l compañeru de l’alcaldesa Botella, Iñaki Ortega, que foi quien dio la subvención. Y dixo más. Dixo que "el comerciu electrónicu, les nueves tecnoloxíes y les plataformes web, convertiéronse nel nichu de referencia de les nueves actividaes económiques, con independencia del sector". Y amestó qu'ésti, en concretu, ye un sector "onde la tecnoloxía ye bien importante, ye dafechu llegal y tien una clientela bien respetable".

Yo, la verdá, en cuenta xulgalo y mandalo a la cárcel, proponíalo pa un premiu de relatu fantásticu y de ciencia ficción.