Los dioses aliméntense de prótesis

Milio Mariño

Nun ye ciertu que podamos ponenos nel llugar d'otru. Lo que si podemos ye entendelo y entender los sos sentimientos. Por eso entiendo perbién lo que debe sintir Adrián, esi rapaz de 23 años al que-y retiraron una prótesis, que costaba 153 euros, porque nun podía pagala.

Dixo Adrián que, dempués del incidente, pasare la nueche entera con fuertes dolores y tomando calmantes. Pero esclarió, desiguida, que nun foi pola falta de la prótesis, que’l dolor teníalo na cabeza.

Entiéndelo cualquiera. Cierto que la rodiya debía tenela estrozada pero lo que más-y dolía, y siguirá doliendo-y, ye que lo trataren como nengún ser humanu trataría a un animal.

Sabíemos que los políticos qu'eliximos protexíen a los banqueros enantes qu'a nós pero, polo visto, tamién tan dispuestos a satisfacelos na crueldá d'esixir que los retayos s’apliquen onde más nos duel: a los cuerpos cuando tan en manes del ciruxanu, la salú de les persones, la subsistencia de los vieyos y el desamparu de los dependientes.

Creyíemos que nun díbemos llegar a esto, pero yá llegamos.