La realidá, murnia y cruda, de los políticos

Milio Mariño

Entovía hai xente que cree que los políticos viven a cuerpu rei y ganen perres a embute. Hai muncha inorancia nel mundo. La xente nun ve, o nun quier ver, que’l Partíu Popular tenía que da-yos sobresueldos a los suyos pa que pudieren llegar a fin de mes.

El partíu ayudábalos un pocu, pero lo más triste ye que los amigos, viendo que los ministros y los altos cargos del PP taben a la quinta entruga, nun teníen otru aquello que paga-yos les bodes y les comuniones, amás de merca-yos traxes, bolsos y reloxes pa que tuvieren presentables y nun fueren perehí dando'l cante.

Pa que llueu digan que la política ye un choyu. Ríome yo de los choyos. Si non fuera por Correa y El Bigotes, la fía d'Aznar, qu’entós yera Presidente del Gobiernu, en cuenta d’un banquete de boda tendría que conformase con una espicha nun llagar corrientucu. Y los fíos d'Ana Mato con una xocolatada ensin xurros nin payasos.

Pero seguimos atesterando no mesmo. Facemos casu a los periódicos y tomámosla colos políticos. Hai quien, inclusu, s'entruga qué d'ónde sacaben esi dineru. D'ónde van sacalo alma cándida… del Bancu.