Ropa puerco

Milio Mariño

La ropa que mercamos merez un repasu. Pa Zara, Mango, H&M, El Corte Inglés y etc, etc, los chinos yá salen mui caros, de mou que marcharon a otros países onde la xente trabaya más y cobra menos. Países como Bangladesh, onde va un par de selmanes derrumbóse un edificiu qu'allugaba delles fábriques testiles y yá se cuenten 501 muertos y más de 2.500 firíos.

Muerren tres persones en Boston y armase la de coyer pero muerren 501 en Bangladesh y apaez nun recuadrin escondíu.

Mialma ye vergonzosu como eses empreses esclavicen a la xente ante la indiferencia del mundu. Con tou, y nun ye por esculpanos, el negociu nun ta, como quieren facenos creer, en qué les camisetes que mercamos nos salgan más barates. El negociu ta nel marxe de beneficiu. Ehí tienen a Ortega, el dueñu de Zara, qu'acaba d'embolsase 406 millones d'euros como adelantu de los beneficios de 2012 y al que-y calculen un patrimoniu de 38.000 millones d'euros.

A lo meyor, si'l dueñu de Zara fabricara la ropa n'España, en cuenta de tener 38.000 millones, igual tenía, namás que 3.000. Lo cuál esplica que los empresarios nun tean pola llabor de crear empléu equí.