Tamos en mayu y, esta nueche, hai lluna yen

Milio Mariño

Dicíalo ayer un estudiante portugués qu’entrevistaron pola tele: Namás nos queda la revolución. Una respuesta que podéis tomar a broma pero que ye la verdá. L’orde establezse por un equilibriu de fuerces, de cuenta que cuando esi equilibriu se ruempe, cuando l'orde nun amuesa capacidá pa introducir los cambeos que la tensión social esixe, apaez la revolución.

Güei, agora mesmu, vamos por esi camín. Voi cuntavos un detalle. Seguro que toos percibistis, dalguna vez, un fenómenu misterioso y difícil d'esplicar. Que, de sópitu, nun momentu determináu, la xente sabe que llegó'l final y dexa de tener mieu.

Pos bien, eso ye lo que va pasar. Pasará que dientro de poco, o d'un pocu más, la xente va esplotar.

Tien tola traza. Los partíos y los sindicatos yá tiraron la toballa. Tán ocupaos n'azorronar y disimular la corrupción y siéntense incapaces ya deslexitimaos p’asumir les demandes de los ciudadanos. Falen de movilizaciones, pero nun se refieran a les que convoquen ellos, que nun convoquen denguna, sinón a les del 15-M, los afeutaos poles hipoteques, la sanidá pública, les plataformes civiles y etc, etc.

Quier dicir qu’esto, tal como lo conocíemos, acabóse.

A lo meyor, pienso asina porque tamos en Mayu y, esta nueche, hai lluna yen. Pero ehí lo tenéis, güei llevantéme rebelde.