El Bosón de Bárcenas Premio Príncipe d'Astucies

Milio Mariño

El xuráu del Premio Príncipe d'Astucies, aconceyáu ayeri n'Uviéu, después de deliberar abondo, concedió'l famosu premiu a los descubridores del Bosón de Bárcenas. Esto ye, a los responsables del Gran Colisionador de Lladrones, que trabayaron de manera paralela, anque independiente, en busca de la mesma partícula, y declararon, con total certidume, que dieren con ella.

Pa nos ta claro que dimos col Bosón de Bárcenas, anque inda queda un llargu camín pa saber qué tipu de bosón ye, dixo'l voceru del esperimentu.

El xuráu tuvo en cuenta, y asina lo punxo nel acta, qu'esi descubrimientu constitúi un exemplu emblemáticu de cómo l'esfuerzu coleutivu consiguió resolver unu de los enigmes más fondos y enrevesaos d'España.

Pal premiu fueren propuestos, en base a los méritos contrayíos, la familia Pujol, Díaz Ferrán, el matrimoniu Urdangarín y el Bosón de Bárcenas.

Dempués de llargues deliberaciones, el xuráu decidió que llegaren a la final el matrimoniu Urdangarín y El Bosón de Bárcenas y, anque enantes les votaciones fueren reñíes, el premiu decidióse por unanimidá.