Les Lindeces del Gobernador del Bancu d’España

Milio Mariño

José María Linde, que ye'l Gobernador del Bancu d'España puestu pol PP, dixo, va unos díes, nun coloquiu entamáu pel Círculu d'Economía de Menorca, que los escándalos de corrupción nun perxudiquen la recuperación económica pos la capacidá de reactivación depende, al so xuiciu, d'otros factores más importantes.

Llástima d'apellíu señor Linde, por una lletra nun tien, usté, el que-y correspuende daveres: Lince. La visión qu'apurre tranquilizanos nun sabe cuántu. De toes formes yá barruntábemos dalgo asina, yá tábamos na onda de que la corrupción nun inflúi na reactivación económica. Lo qu'inflúi ye esi enfotu obsesivu de los obreros, que s'empeñen en tener trabayu y sueldos de mil euros. Y si a eso xuntamos que tamién quieren poder pagar la hipoteca y tener vacaciones y sanidá y educación gratis, pa los fíos, qué quier que-y diga. Con eses pretensiones la economía, mialma, nun va reactivase nin en vente años.

Gracies poles Lindeces, señor Linde. El so xefe atinó de plenu nomándolo Gobernador del dineru. Vese que lo que más priesa corre ye quitái importancia al escándalu.