Dices, nel to escritu al xuez, que la xente nunca se va enterar de la murnia que sientes ya sentisti al comprobar que nin la probeza nin la castidá esiste en delles persones que se-yos supón. Qué razón tíes, entiéndote perbien José Manuel. Entiendo lo que tuvisti que sentir cuando, dientro la catedral, percibíes que dellos cures diben más alló de lo paternal y cuando, quiciabes ensin querer, víes eses rellaciones sexuales que dices presenciasti.
Entiéndolo tou anque nun comparta la to indignación poles palmadines en culu. Ciertu que ye grave, pero si la cosa quedaba ehí, en palmadines… A min paezme muncho más grave eso que cuentes de que metíen la mano na bolsa y sacaben el dineru de les llimosnes. Y tamién lo otru, lo de que se quedaben colos recipientes de plata, los xamones, los bonos vinos…
Allégrame que lo cuentes, que descargues el dolor de tantos silencios y que-y digas al xuez los nomes y apellíos d’esos malos cristianos, y peores cures, anque a nós nun mos llegaren nin les iniciales.
Non t'esmolezas Xosé Nel, pues tar tranquilu que’l Papa nun dimitió pol lladroniciu y el sexu na Catedral de Santiago, dimitió por coses peores.
No hay comentarios:
Publicar un comentario
Milio Mariño