De vuelta al ruedu, parllamentariu

Milio Mariño

Mentes los del Gobiernu remataben la faena col descabellu de los partiducos pequeños, un Navarro que diz ser catalán, socialista y republicanu pero que, pa min, nun sabe lo que ye pidia otru Rei. Eso sí, provisional. Quiero suponer que por otros 30 años, que sedrá cuando Felipe cumpla los 75 y Letizia engorde dos quilos o trés.

Armóse un pelín de revuelu pero nin putu casu, los diputaos del PP taben a lo suyu, aplaudiendo a Rajoy nun semicírculu que paecía la Monumental. Fuera, na cai, Bárcenas llevantaba acta, ante notariu, de la llista de donantes y agraciaos y Alicia Sánchez Camacho facía d'alguacil alguaciláu, solidarizándose coles compañeres y compañeros del partíu pa que seyan más a facer el ridículu.

Entrín y non, pa que la fiesta fuere dafecho, una Secretaria de Emarsa declaraba qu'ella mesma, en persona, llevó-y dos bolsos de Loewe a Rita Barberá. Colo cual, a esti pasu, mialma que nun va quedar señora del PP que nun recibiera un bolsu de barakalofi, que ye como-y llamen los calés.

Concluyimos el repasu colo dicho por ERC y el Financial Times, con que'l Gobiernu subvenciona con 700 millones d'euros la fiesta de los toros. Con razón diz la drecha que Rajoy tuvo de vuelta al ruedu.