Corinna diz que, realmente, trabayó pa España

Milio Mariño

Corinna ye una señora, de 48 años, que vive en Mónaco y caltién una rellación de candial amistá con Xuan Carlos, al que conoz dende 2004.

Supimos d’esta sorriente y guapa señora cuando la prensa tuvo'l detalle de dicinos qu'acompañaba al Rei na cacería de Botsuana, n'abril de 2012, y volvemos a saber agora, poles sos declaraciones al diariu El Mundo.

Unes declaraciones nes que dixo que trató d'ayudar a Urdangarín buscándo-y, como-y pidió, un empléu compatible cola so posición. Pero dixo más. Dixo tamién que participó en dellos asuntos secretos y en negocios onde intervieno'l Rei, como Xefe del Estáu, puntualizando que temos tranquilos, que nun cobró del Gobiernu, que cobró de los empresarios. Lo cuál compromete y empeora, más si cueye, la situación personal ya institucional del Xuan Carlos y a los españoles déxanos plasmaos, cola cara fata de quien se siente engañáu por tou dios: por un Gobiernu de mentirosos ya corruptos y por un Rei que nun sabe, siquiera, nin aplicase a si mesmu esi refrán popular que diz: Onde tengas la olla non metas la polla.

En cualesquier país democrático esixiríase que'l Gobiernu y el Rei esplicaren el trabayu d'esta señora, non ente les sabanes, qu’eso malditu si nos interesa, pero si en nome y representación d'España.