Confiamos na xusticia porque nun hai otru remediu

Milio Mariño

Dizse que la xusticia ta politizada, y tá, qu'hai xueces prevaricadores, y ha-ylos, que nos altos tribunales campa la derechona, que foron los qu'echaron a Garzón porque destapó lo de Gürtel, y debió ser asina, pero con tou, y lo que quieran amestar, la Xusticia ye, güei, l'únicu poder del Estáu qu'inda nun ta desacreditáu dafechu. Ye l'únicu asideru al que podemos garranos porque tou lo demás cayó o ta cayendo a pedazos.

Plasma la podredume: entamando polos partíos políticos, siguiendo pola monarquía y acabando por una institución, como la Ilesia Católica, que nun forma parte del Estáu pero ye un poder d'enorme influencia dientro del mesmu.

Con esti panorama, la Xusticia ye lo únicu a lo que podemos garranos y garraríamos pa nun soltanos si punxera fin a lo que, mialma, paez que nun cuadra: Que la Infanta nun tea imputada y que Bárcenas siga saliendo, con chulería, de so casa cuando tendría que tar na cárcel.

Asina y tou, defendo la Xusticia que tenemos non porque m'entusiasme sinón porque barrunto que, d'equí a nada, apaecerá dalguién importante, como n'Italia Berlusconi, y soltará dalguna patochada, como que los xueces son una mafia, pa dinamitar la poca ilusión que nos queda.