Fai un fríu que pela, pero na cai tase caliente

Milio Mariño

Va unos artículos, falaba del fríu enfotáu que nun volveríemos a velo esti iviernu, pero acabo de llevantame y veo que’l mui cabrón acesma tres los cristales. De momentu va xodese; toi a cubiertu esfrutando del calorín d'un almuerzu caseru mientres escucho a Beegie Adair, al pianu, tocando les canciones de los Beatles.

Tampoco creáis que siempre me llevanto asina de tienru, hai díes qu'inauguro la mañana col tex-mex de Flaco Jiménez. Otros con nada, con un café, unes tostaes y la priesa por poneme delantre la pantalla a sabiendes de que voi a encabroname cola perda de drechos y llibertaes qu’atopare nes noticies, colo que tanto nos costó conquistar y tamos perdiendo.

Dios me llibre de presumir pero na conquista d’esos drechos, unu tuvo so parte. Por eso, después, a la tarde, sí que voi dir escontra del fríu, porque nin la ñeve, nin l'agua, nin el xarazo van torgar que salga a manifestame. Voi dir bien abrigáu, sobremanera pa que non me reconozan nin los amigos. Nun quiero velos, son más de trenta años caminando y, tal día como güei, fastidiaríame volver atopalos onde tábemos al entamu.

Esa foto preciosa ye de Chema Madoz