El 18 de xunetu de 2013

Milio Mariño

A mediaos de xunetu de 2013 tomó cuerpu una doble cospiración, facha y civil, contra'l Presidente del gobiernu Mariano Rajoy. La primera respondía al deséu, de los reaccionarios, d'asitiar na presidencia a Esperanza Aguirre, y la segunda, escorría'l propósitu de restaurar l'orde social y económicu, que cayera a tomar pol sacu, por culpa la corrupción, el lladroniciu y la pasividá de les autoridaes.

Dende’l primer momentu los militares asitiáronse a la vera del pueblu ofreciéndose pa lo que fixere falta. Tal foi asina que na madrugada del 18, dellos xenerales ordenaron a Rajoy que fuere al Congresu a presentar la renuncia, y a primer hora de la mañana, el pueblu echóse a la cai pa sofitar y peracabar un Golpe d'Estáu, que consideraben llexítimu, contra un Gobiernu tiranu y corrupto.

Los diputaos Cospedal, Pons y Floriano comparecieron en televisión y negaron que los sublevaos algamaren el poder, pero l'estáu de nervios nel Gobiernu yera estremáu, empezando pol Presidente, al que vieron tatexar y esbabayase tentando fumar un puru pola parte que taba prendíu.

Nesti momentu, el golpe ta trunfando en, práuticamente, tol país menos Ceuta, Melilla y les islles Canaries, on de va con un pocoñín de retrasu.