De xuez prevaricador a defensor equí mando yo

Milio Mariño

Dellos titulares de prensa atribúin a Gómez de Liaño, el nuevu abogáu de Bárcenas, la frase equí mando yo, refiriéndose a quien va establecer la estratexa de defensa del ex tesoreru del PP.

Anque sobre'l papel sía llegal antóxaseme otru escándalu de corrupción que Liaño puea exercer y facese cargu de la defensa del presuntu delincuente que ta braniando en Sotu del Real.

Gómez de Liaño foi un xuez prevaricador, condergáu a 15 años d'inhabilitación por un delitu siguíu de prevaricación, espulsáu de la carrera xudicial ya indultáu por Aznar, nuna decisión que contradicía, inclusive, un informe del Tribunal Supremu, que se pronunciara en contra de reintegrar al ex maxistráu.

La sentencia contra Liaño nun podía revisase nin anulase, pero Aznar fíxo-y el favor del indultu atendiendo a una campaña d'El Mundu, periódicu nel que Liaño collaboraba dempués que lo espulsaren como xuez.

Col tiempu toles pieces encaxen. Tou vuelve al so sitiu. Al aceutar la defensa, Liaño nun fai otra cosa que pagar una delda contrayía con Aznar y col PP. Liaño ye unu de los suyos, de mou que va poner en marcha to'l marayu políticu xudicial pa que la mierda nun chisque a Rajoy y tou quede nunos díes a la solombra del so veceru y amigu.