Severo Ochoa, el científicu asturianu galardonáu en 1959 col
Premiu Nóbel de Fisioloxía y Medicina, descansa, yá pa siempres, na cumal d'un
cantil, frente a la mar del Cantábricu. Ellí tán los sos restos, nel campusantu
de L'Atalaya, un llugar preciosu dende onde s'acolumbra la mar verde y azul,
les cases blanques que finsen el monte hasta llegar al puertu, el ríu Negru y
la cayuela negra de los teyaos. Ellí ta Don Severo, nel panteón familiar, al
pie de la so muyer, Carmen, la so madre y les tres hermanes. Ellí lo enterraron,
un día soleyeru de seronda, al son d'Asturies patria quería, interpretáu pola
coral Villa Blanca.
Severo Ochoa ñaciera, en L.luarca, el 24 de setiembre de 1905,
nuna casa que taba xunta la ilesia y nun yera la prevista pa la so nacencia,
pos los padres, por unos trámites burocráticos, entá nun pudieren instalase en Villa
Carmen, un xalé asitiáu na parte alta, nel Villar, qu'acababen de comparar a
los herederos del marín y aventureru Ventura Olavarrieta, por 150.000 pesetes.
Ochoa yera fíu de Severo Manuel Ochoa y de Carmen de
Albornoz, pero enaína quedó ensin padre, a los 7 años, y un añu depués la madre
y él treslladáronse a vivir a Málaga, por conseyu de la so güela Concha, que
yera d'Orihuela y quixo llevar al sur a tola familia. Perembargu, mientres la
so infancia y la so mocedá, y llueu a partir de 1986, des que morrió la so
esposa Carmen, Severo pasaba los branos en
L.luarca. Y en L.luarca asitiaba los sos primeros alcuerdos.
La mio conciencia d'Asturies, dicía Severo, empecipia na
vecina aldega del Villar, percima de la llanada que termina nun pindiu y mui
guapu cantil, valtiáu, na so base, pola mar. Ellí braniábemos desque tengo usu
de razón. Alcuerdo'l perfil del monte, ñidiu, con tolos tonos verdes
imaxinables y la presencia del mar Cantábricu, tranquilu y azul n'ocasiones, de
cutiu gris y casi siempres amenazador.
Severo Ochoa atribuyía la so afición pola bioloxía al fechu
de ñacer ya vivir la so infancia en L.luarca. Fui un entusiasta observador
dende bien neñu. Les mios andances poles sableres de les cercaníes fixeron que
naciera en mi un gran amor pola naturaleza. Sobremanera na playa de Portizuelu,
una sablera de cantu rodáu y gran guapura paisaxística, na qu'alcuerdo que
mientres la baxamar pasaba les hores muertes reparando na enorme variedá de
vida animal y vexetal que poblaba los pozos formaos, al retirase la mar, nos
furacos de les roques.
A L.luarca y tamién a Juan Negrín, que yera caderalgu de
medicina y depués sedría Presidente del gobiernu de la República, debemos que
Severo Ochoa se dedicare a la investigación. Negrín estudiara n'Alemaña y tenía
por vezu escoyer, pa que lo ayudaren nel llaboratoriu, a los estudiantes
meyores. Foi'l primeru que-y propunxo trabayar na busca d'un métodu p'aisllar
la creatina. Y Severo llogrólo. Llogró aisllar la creatina, na orina, y tamién
escurrió la forma de midir pequeñes cantidaes de creatinina muscular. Tenía 21
años, aquel estudiante de medicina qu'acabaría la carrera dos años dempués, en 1928,
y darréu solicitaría una beca pa trabayar con Otto Meyerhof, en Berlín.
Afaláu pol ésitu del so primer trabayu, Severo Ochoa entamó
la so carrera d'investigador, sobre farmacoloxía ya bioquímica, que lo llevaríen
a la fama ya consiguir, en 1.959, el Nóbel de Medicina, una carrera que
desarrolló, principalmente nel estranxeru. Primero n'Alemaña y el Reinu Uníu y
finalmente n'Estaos Xuníos, país al que pudo fuxir, exiliáu, gracies a un salvoconducto
que-y apurrió Juan Negrín.
Severo Ochoa salió d'España per Barcelona, llevando siete
mil dólares que la so muyer, Carmen Cobian, llograra de la lliquidación d'unos
negocios familiares. El primer destín foi a Alemaña, en 1940, depués foi a
Oxford y, en 1942, por conseyu de la muyer y
cola ayuda d'un amigu becariu, treslladóse a Nueva York, onde trabayó
hasta'l so primer retiru, cuando tenía sesenta y nueve años.
Severo, que venía de xemes en cuando a España, nun volvió
definitivamente hasta 1985. Taba a gustu en Nueva York, ellí tenía medios pa investigar
con total llibertá mentes que, equí, la escasez de medios diba xoncía a la
pervivencia d'un réxime políticu que nun soportaba. Una preba, qu'evidencia'l
so refugu al réxime franquista, foi cuando a Severo Ochoa lo convidaron al 25
Aniversariu del Conseyu Superior d'Investigaciones Científiques y asistió al
actu representando a l'Academia Nacional de Ciencies. Mientres el so discursu,
volvió-y el llombu a Franco, que presidía la solemne sesión. La so muyer
reprendiólo, dixo-y que nun se podía actuar asina ante un Xefe d'Estáu, pero
don Severu nun podía escaecer la Guerra Civil nin los sufrimientos de los
españoles, especialmente de la so familia. Yera un republicanu convencíu. Él y
Paco Grande pasiaren per Madrid, nun coche, ximelgando la bandera republicana, el
primer día que se proclamare la República. Amás, Severo, quería muncho al so
tíu carnal Álvaro de Albornoz, que foi Ministru de Xusticia y tuvo na so
oficina, como pasante, a Victoria Kent.
Al terminar aquella sesión formal del Conseyu Superior
d’Investigaciones Científiques, Severu salió al patiu y averóse-y un ministru pa
dicíi que Francisco Franco taba esperándolo. Y, entós, don Severu, mirando pal reló, dixo: "Féxoseme mui tarde,
ye la hora de colar".
A pesar del so republicanismu acerrimu, Severo Ochoa sentía un ciñu especial pol rei Juan Carlos. Apreciábalo
muncho pero negóse, por dos veces, a que'l monarca concediéra-y un títulu
nobiliariu. Amás de republicanu, Severo tamién yera un agnósticu convencíu, nun
quería tener tratu nin saber nada cola Ilesia pero, nesti casu, toleraba y
acompañaba a la so esposa Carmen a dellos actos relixosos.
Carmen finó en Madrid, el 5 de mayu de 1986, un añu dempués
de que tornaren a España dafechu. Severo quixo que la enterraren en L.luarca,
onde decidieren, diba tiempu, descansar, definitivamente, los dos.
Depués de la muerte de Carmen los viaxes a L.luarca fixéronse
bien frecuentes. Encargare que siempres hubiera flores fresques sobre la
sepultura de la so muyer y visitábala de cutiu. Con 81 años viaxaba, solo,
dende Madrid conduciendo'l so coche, un Mercedes vieyu. Encantába-y conducir y
eso que malpenes vía del güeyu derechu. Tantu-y daba, cuando-y pitaben dicía
que nun yera por conducir mal, que yera que toos lu conocíen y queríen saludalo.
A Severo Ochoa
gustáben-y enforma los coches, la velocidá, el martíni secu, el mariscu, los
platos típicos d'Asturies y, sobremanera, L.luarca. Ellí nació y per ellí
pasió, los últimos años de so vida, xubiendo, pasín ente pasu, apalicándose nun
cayáu, pola cuesta que lleva a L'Atalaya, un privilexáu llugar, frente al mar
del Cantábricu, nel qu'agora descansa, xunto con tola familia.
No hay comentarios:
Publicar un comentario
Milio Mariño