Tuvieron nel Paraísu: Ramón y Cajal en Llastres

Milio Mariño

Santiago Ramón y Cajal, el científicu español, Premiu Nóbel de Medicina en 1906, polos sos estudios sobre la fisioloxía del sistema nerviosu, unu de los  mayores xenios que dio la humanidá, branió na villa marinera de Llastres, per espaciu de dellos años, a la fin del sieglu diecinueve. Cajal alcontróse con Llastres por conseyu d'un antiguu alumnu, y gran amigu suyu, Pedro Villarta Encinas, qu'exercía de médicu rural y fuere contratáu pola Confradía de Pescadores.

 Aquella primer visita de Ramón y Cajal, a Llastres, presto-y tanto que motivó que'l científicu caltuviera una bien bona rellación con Asturies. Una rellación que nun se llindió a les sos estancies na villa marinera, pos Santiago tamién tuvo en Piloña, nos Picos d'Europa, en Cangues del Narcea y en Salines, onde branió un añu agospiándose nel Gran Hotel La Esperanza, convidáu pol doutor José María Pérez Gutiérrez, alcalde de Castrillón, con quien compartía una gran amistá.

Los branos que, Ramón y Cajal, pasaba en Llastres avezaba a esfrutalos dando paseos pol puertu, faciendo semeyes y xuntándose colos pescadores, colos que charraba, n'animaes tertulies, de les llabores de pesca y les hestories de naufraxos que-y cuntaben. La orixinal y complexa personalidá de Ramón, la so gran formación humanística y les sos dotes como escritor, dibuxante, pintor, fotógrafu ya, inclusive, como atrevíu filósofu que fixo les sos incursiones nel pensamientu de la so dómina, onde siempres defendió l'europeísmu y participó de la institución Llibre d'Enseñanza, fixeron qu'aquelles conversaciones, colos pescadores de Llastres, sirvieren como apuntes  pa los sos rellatos fantásticos, narraciones pseudo-científiques, como él les llamaba, que publicó col títulu de Cuentos de Vacaciones y malpenes tuvieron espardimientu, pos foi'l mesmu Cajal quién autoeditó esos cuentos pa regalalos nel so círculu d'amistaes.

Nos paseos per Llastres, Ramón y Cajal siempres llevaba enriba la so cámara fotográfica, una de les sos grandes pasiones dempués de que'l so padre prohibiéra-y estudiar dibuxu cuando cursaba'l bachilleratu en Huesca.

En Huesca, gracies a unos fotógrafos ambulantes, foi onde Cajal afayó la fotografía y, mediu a les escondidielles, empezó a interesase pola cámara escura y un nuevu procedimientu, el gelatino-bromuru, que llogró perfeicionar y aportó a ser mui solicitáu polos fotógrafos de la dómina.

Santiago aprovechaba cualesquier momentu pa facer semeyes de les persones y los paisaxes que-y paecíen más singulares. Los sos herederos caltienen una coleición de fotografíes, malpenes 300 de les más de 2.000 que dexó como legáu, nes que figuren munches fotografíes de Llastres y d'otres partes d'Asturies. Tierra que visitó per primer vegada en 1887, el so gran añu como él lo calificaba, y siguió visitando hasta 1930, que foi cuando tuvo en Salines, yá octoxenariu y cola salú bien frayada. Ente medies cueye citar un curiosu branéu, en Cangues del Narcea, onde tuvo en 1914 acompañáu de trés caderalgos de la Instrucción Llibre d'Enseñanza pa visitar  el monte de Muniellos y el valle del ríu Cibea, onde buscaron cueves que pudieren sirvir d'abellugu al home primitivu.

Nací'l 1 de mayu de 1852 en Petilla d'Aragón, humilde llugar de Navarra enclaváu por singular caprichu xeográficu metanes la provincia de Zaragoza. Asina empieza'l llibru autobiográficu de Santiago Ramón y Cajal nel qu'esbilla, a lo llargo de 266 páxines, socesos de la so neñez y la mocedá. De les páxines del llibru esprendese que Cajal foi un neñu rebalbu al que'l so padre intentó torar col estudiu intensivu. A los seis años yá escribía correchamente y tenía nociones de xeografía, aritmética y francés. Non contentu con eso, pa qu'escaeciera aquella pasión pol dibuxu, el so padre buscó-y empléu primeru como aprendiz de barberu y depués de zapateru. Tamién, dende bien nuevu, prauticó l'exerciciu físicu como quien diz a destayu, lo que-y dexó algamar una traza que, naquellos tiempos, causaba almiración.

Acabante de llicenciase en Medicina, en 1873, Ramón y Cajal foi llamáu al serviciu militar, pero coincidió que convocaron oposiciones pa médicu Militar, presentóse y ganó una de les places vacantes, ingresando nel exércitu como teniente. N'abril de 1874 recibió la orde de treslladase a Cuba, que taba en guerra, y ascendiéronlo a primer ayudante médicu col grau de Capitán. Dos años dempués tornó de Cuba enfermu de paludismu. Aprovechó la convalecencia p'aprender inglés y preparar nueves oposiciones y, el 18 d'abril de 1877, consiguió'l cargu de profesor interín na Facultá de Medicina de Zaragoza. Malpenes pudo esfrutalo, enfermó de tuberculosis y el so padre, convencíu de que podía sanar, mandólo al balneariu de Panticosa pa que tomara les agües y permaneciera dos meses nun conventu de flaires. Naquel tiempu Cajal llegó, inclusive, a pensar nel suicidiu pero superó la enfermedá.

En cuantu tuvo repuestu llogró la cátedra de Medicina de la Universidá de Valencia.  Y en Valencia permaneció hasta qu'en 1901 foi nomáu, por Francisco Silvela, direutor del Institutu d'Investigaciones Biolóxiques, con un sueldu añal de 10.000 pesetes. Sueldu que, Don Santiago, consideraba escesivu y llogró rebaxar a 6.000 dempués d'atesterar enforma.

Amás de Premiu Nóbel, Cajal foi doutor honoris causa poles universidaes de Clark, Boston, la Sorbona y Cambridge. Xubilóse en 1922, a los 70 años y, yá xubiláu, dedicóse a escribir sobre los suaños y la psicoloxía perfonda. Toles mañanes apuntaba lo que suañaba la nueche anterior y llegó a pagar a una supuesta médium de Zaragoza cola que llevó a cabu dalgunos esperimentos sobre espiritismu.

Sospriende que Cajal confiara nuna muyer qu'afirmaba tar inspirada pol arcánxel San Gabriel y contestaba a les entrugues, según dicía, al traviés del espíritu d'una hermana del científicu, que fuere monxa y morriera diba tiempu. A la fin Cajal afayó'l trucu: la hermana nun yera otra que la mesma médium, una peracabada ventrílocua que yera capaz de falar ensin mover la boca y los llabios de forma bultable.

Un datu pocu conocíu de la biografía de Cajal ye la ufierta que-y fixo la CNT, en 1925, pa que fuere Presidente de la futura República Federal. Cargu que nun aceptó, como yá fixera con otres propuestes de cargos políticos, escusándose en que se comprometiera col trabayu científicu y tenía que dedicar tol tiempu al estudiu, la investigación y el trabayu nel llaboratoriu.

Santiago Ramón y Cajal recibió, na medianueche del 6 d'ochobre de 1906, un telegrama dende Suecia, nel que se-y comunicaba que recibiera'l Nobel de Medicina, pero la so reacción foi camentar: Esto ye una chancia de los estudiantes. Convencióse de que yera verdá cuando, a otru día, lleyó'l periódicu.

Insomne de tola vida, nos últimos años, Ramón y Cajal, mialma que yá nun dormía. Taba día y nueche despiertu pero caltenía la so lucidez. Finó, en Madrid, el 17 d'ochobre de 1934, a les once la nueche.

 

Milio Mariño / Del llibru, entá, inéditu, Tuvieron nel Paraisu