Pa Ramón Pérez de Ayala quiciás, el de 1.903, fora'l meyor
branu de los munchos que pasó en Noreña. Braniaba ellí dende neñu; nuna casona
de tres pisos, con una güerta grande, qu'arrendaba'l so padre Cirilo, dueñu
d'un seleutu almacén de xéneros, que fundara col so hermanu Ramón, qu'aportó a ser
alcalde d'Uviéu.
Pérez de Ayala
llevaba tiempu braniando, solu, n’aquella casona. Quedara ensin madre bien
llueu, a los diez años, y siempres se resintió d’una orfandá que se vio engrandada
polos internaos nos xesuites: primero nel colexu San Zoilo, de Carrión de los
Condes, y depués nel Inmaculada de Xixón, onde mialma que lo pasó bien mal y al
que fai alusión na novela autobiográfica, A.M.D.G. na que cunta la so propia
esperiencia, rellatando dellos abusos sexuales de los flaires y los castigos
esaxeraos, de los que llogró safase gracies a la intervención del so güelu
Diego, que tenía un hotel na cai Corrida y yera la única persona de la familia
que lo visitaba los sábados.
N’aquel branu que diximos, el de 1903, Pérez de Ayala facía
yá dos años que se llicenciara en drechu. Acababa de publicar, en Madrid, el so
primer llibru de versos, La Paz del sendero, y taba que nun coyía en si
d’arguyu, de cuenta qu'analayaba solu pola casona, lleía, escribía y pintaba,
afondando naquel enfotu, que siempres tuvo; na necesidá d'una educación
estética. Mercare un ropón de flaire y salía vistíu d’aquelles traces a pasiar
pola güerta. Amás tenía'l pelo llargu, casi melena, y usaba monóculu. Tou un personaxe, un tipu raru qu'ablucaba a
los habitantes de Noreña, onde conoció a Evaristo Valle, que tamién facía de
les suyes, pos el pintor xixonés, dempués de consiguir una beca del Conceyu de
Xixón, pa que viaxare a París y tuviera ellí un añu, completando los estudios,
non se-y ocurrió otra cosa más qu’engañalos y quedase a pintar en Noreña, en casa d'unos familiares.
Noreña yera un pueblin, de mou que casi taba cantáu que
Ramón y Evaristo se conocieren y se fixeren bonos amigos. Encantába-yos charrar,
diben xuntos a tolos sitios. Daben llargos paseos pola contorna del pueblu y
nun debíen pasar desapercibíos pos, enantes de finar el branu, a Valle, llamáronlo
a capitulo, lleváronlu mediu deteníu a Xixón y quitáron-y la beca que-y dieren
los del Conceyu pa qu’estudiare en París.
Pérez de Ayala dicía, del so amigu, que tenía unes facultaes
tan estraordinaries pa pintar, que siempres pintaba de ceyes p’arriba.
Conxeniaben perbién. Valle yera un pocu mayor, tenía 30 años, mentes que Ramón,
que ñaciera n'Uviéu'l 9 d'agostu de 1880, cumplía 23 aquel mesmu branu. Bien nuevu, con malpenes 15 años, matriculárase
na Universidá pa realizar el cursu preparatoriu d'Inxenieros; un añu dempués
camudó d'idea y entamó’l primer cursu de Ciencies, que tamién abandonó pa cursar
la carrera de drechu, baxu la protección de Leopoldo Alas, Clarín.
Dempués d'aquel branu, el de 1903, Pérez de Ayala tardaría
25 años en volver a Noreña. Volvió en 1928, cuando yá tenía cierta fama,
convidáu pol Atenéu pa que diere una conferencia. Entós vivía en Madrid y cobró
500 pesetes, una cantidá que, a los organizadores, paeció-yos una desaxeración.
Les estancies de Pérez de Ayala en Noreña, en Cenciella como
la llamaba, quedaron descrites nuna brillosa novela vanguardista, “Luz de
domingo”, que ye como un cuadru pintáu arrede nel que, percima de presentar a la
sociedá d’entós, diz lo que realmente asocede nella, desafiando los calces
xenéricos, por aciu d'un testu qu'entemez prosa y versu y ufierta frebes
d'esquisita factura.
“Luz de domingo” foi llevada’l cine, 104 años dempués,
por José Luís Garci, tresformándola nuna
película que collechó munchos ésitos.
La obra entera de Ayala ye llarga ya ta trescalada de
moralismu. Gustába-y escribir sobre ciertes realidaes sociales que, al so
xuiciu, acaroñaben la esistencia cotidiana de los españoles. En 1907, publicó,
col seudónimu de Plotino Cuevas, “Tinieblas en las cumbres”, una hestoria cruda
na que rellata'l viaxe en tren d'unos señoritos y unes moces, d’un prostíbulo
d'Uviéu, pa ver un eclís de sol. Aquella obra provocó un gran escándalu que concidió
cola marcha de Pérez de Ayala a Inglaterra p'ampliar los estudios y exercer
como corresponsal en Llondres del periódicu El Imparcial. Asocedió entós, al
cabu d'un añu, el suicidiu del padre, que quitóse la vida cuando se vió
arruináu pola quiebra del bancu onde guardaba los aforros.
El suicidiu del padre fixo que Pérez de Ayala tornare a
España y volviera a instalase en Madrid, onde se dedicó a collaborar en
distintos periódicos, percorrió dellos países d'Europa y esplegó una gran
actividá lliteraria. Escribió “El ombligo del mundo”, una colleición de noveles
curties que dalgunos califiquen como la so obra más representativa. Per
aquelles feches tamién escribió “Tigre Juan”, novela mui aponderada, que foi
l’espaldarazu definitivu pa ingresar como miembru de la Real Academia de la Lengua
Española.
En 1932, el Gobiernu de la República nomó a Perez de Ayala direutor del Muséu del Prado y
darréu, embaxador d’España en Llondres, onde permaneció hasta 1936, cuando
estalló la guerra. Descontentu cola política que facia'l Frente Popular,
dimitió del so cargu en xunu de dichu añu y en setiembre, coló d’España y exilióse
en Francia. El so desalcuerdu coles, entós, autoridaes republicanes llegó a tal
estremu que tomó la estraña decisión d'unviar a dos de los sos fíos a lluchar
como voluntarios nel exércitu de los sublevaos, decisión que, dos años dempués,
esplicó nuna Carta abierta publicada nel periódicu llondinense The Times.
Instaláu en Francia,
Pérez de Ayala vivió primero en París y llueu en Biarritz. L'exiliu llevólo,
dempués, a Bonos Aires, ciudá na que vivió ensin apretures gracies al sueldu de
funcionariu que foi calteníu poles nueves autoridaes franquistes que-y lo
mandaben, puntualmente, al traviés de la Embaxada Española. El viraxe ideolóxicu
que fixera públicu al entamu de la guerra civil favoreció que pudiera gociar de
los favores del nuevu réxime.
Ca vez más alloñáu de los que fueren los suyos, de los llibros
y los periódicos, onde malpenes collaboraba porque la so firma yá nun yera
solicitada por naide, viose sumíu nuna fonda depresión que s'agravó por dellos
reveses familiares. Naquelles circunstancies decidió poner fin al so exiliu y
el 20 d'avientu de 1954 aportó al puertu de Barcelona, procedente de Bonos Aires,
acompañáu de la so esposa Mabel Rick. Afitó la so residencia en Madrid, nel
barriu de Prosperidá y la so actividá lliteraria foi menguando de tal manera
que llimitabase a dalgunes collaboraciones
esporádiques nel periódicu ABC.
Perez de Ayala finó, en Madrid, el 5 d'agostu de 1962, tres
díes enantes del so 82 cumpleaños.
No hay comentarios:
Publicar un comentario
Milio Mariño