Félix Rubén García Sarmiento, – Rubén Darío-, el poeta,
periodista y diplomáticu nicaragüense que fuere consideráu Príncipe de les lletres
castellanes por ser el másimu representante del modernismu lliterariu en llingua
española, llegó a San Esteban de Pravia,
nel branu de 1905, a bordu del ferrocarril Vascu Asturianu. Coyó'l tren
n'Uviéu, un tren de vía estrecha qu'acababa d'inaugurase facía malpenes unos
meses, y llantóse en San Esteban, escoyendo p'agospiase la qu'entós yera la
meyor fonda del pueblu, la fonda “El Brillante”. Un edificiu balconáu que taba,
y entá se caltién, enfrente del muelle, propiedá, entós, del periodista y
empresariu Edmundo Díaz del Riego, fundador de la revista La Ilustración
Asturiana.
Según les sos propies pallabres, Rubén Darío nun venía a San
Esteban como viaxeru nin buscaba aventures o sensaciones nueves, venía a
descansar. Vengo a un rincón pequeñu y solitariu, ensin más casinu que les
aspres roques, nin más automóviles que los cámbaros, ante'l caprichosu
Cantábricu. Eses fueron les sos pallabres. Pallabres que fadríemos bien si les
tomaremos por una metáfora lliteraria pos nin San Esteban yera, entós, un
pueblu pequeñu, ensin automóviles, nin había cámbaros, nin Rubén Darío se dedicó
a descansar, estremáu de la civilización y el bulliciu.
En San Esteban, Rubén Darío descansaba lo xustu, o inclusu, abondo menos de lo que sedría normal. Poles mañanes avezaba a dar llargos paseos con Rafael Altamira, historiador y xurista que tamién s'agospiaba na fonda. Xubía, bordiando los cantiles, al mirador del Espíritu Santu, na mariña de Cuideiru, y dende ellí contemplaba'l Cantábricu y la isla La Deva pero, al escurecerín vistíase de frac, dedicaba un tiempu a escribir les sos cróniques pal diariu La Nación y depués bebía, tocaba'l pianu y esfrutaba de la nueche en compañía de la so criada y xoven amante Paca Sánchez.
A Rubén Darío gustába-y enforma San Esteban y tamién San Xuan
de l’Arena, un pueblu de pescadores que-y encamentara'l so amigu Perez d'Ayala.
Con él y con Azorín, cruciaba la ría del Nalón na llancha de la barquera
Raquel, una ría que-y paecía un llagu pola so quietú, y llantábase en L'Arena.
Un pueblu onde pasó bonos ratos y hasta acabó arrendando una casa. Anque, claro,
cuando Azorín y Ayala volvíen a Uviéu yera otra cosa. Nun ye que llevara una
doble vida, llevaba, como se dicía entós de los intelectuales que manexaben
perres, una vida moderna ya cosmopolita.
Tocaba'l pianu, escribía pal diariu La Nación y divertíase con Paca
Sánchez, a quien, cariñosamente, llamaba Tataya. Una llabradora, de l'aldega de
Navalsauz na sierra de Gredos, a la que, él mesmu, enseñara a lleer y cola que
caltuvo una rellación que duró 14 años, frutu de la cuál ñació un fíu que
depués reconoció y declaró'l so herederu.
Rubén Darío pasó n'Asturies, en San Esteban de Pravia,
L'Arena y Riberes de Pravia, tres branos. Llegó per primer vegada en 1905, y
volvió en 1908 y 1909, cuando, amás d'escritor y poeta, yera Embaxador
plenipotenciariu de Nicaragua n'España. En San Esteban esfrutaba tantu y sintíase
tan a gustu que nos sos artículos pal diariu arxentín La Nación falaba
d'Asturies, ya inclusive dedicó unu a la poesía asturiana en bable. Tamién
escribía poemes nos que dexaba constancia de la so pasión per Asturies: Yo ñací
nun cume cerca del cielu/ onde ruxe'l valiente mar del cantábricu/onde van a
galopie de les galernes/cola cruz de Pelayo, vientos d'España.
Los meyores branos de
Rubén Darío n'Asturies fueron los de 1905 y 1908, pos en 1909 yá empezaba a
tener problemes de salú y el so amigu Feliciano Fernández, a quien conociera en
L'Habana, llevólo a la so finca de Monterrey, en Riberes de Pravia, onde lo
visitaba'l doutor José Arguelles, que lu riñía polos sos escesos y a quien
intentaba sobornar regalándo-y dellos aparatos médicos, como un tensiómetru qu'entá
se conserva. El poeta, bien aficionáu al axenxu y al xampán francés, intentaba
convencer al médicu pa que fuere menos severu. Atrás quedaben aquellos branos
de vida allegre y de, como dicíen les males llingües, bañase de nueche, y
desnudu, cola so amante Tataya, na playa de Los Quebrantos. En 1909 siguía cola
afición a la bebida pero, entós, yá nun diba de chigre en chigre, per San Esteban
y San Xuan de L'Arena. Bebía, a soles, na finca de Monterrey y depués, cuando
taba enfiláu, daba un paséu hasta'l mirador de Monteagudo pa contemplar
l'escurrir del ríu Nalón y recitar, al altu la lleva, poemes y versos
escatolóxicos.
Amás de la enfermedá, una cirrosis hepática, Rubén Darío
llevaba consigo un drama familiar que lo ablucaba y nunca pudo superar. Poca
xente sabía, dende llueu naide de San Esteban, L'Arena o Riberes de Pravia, que
yera fíu d'un cura llamáu Felipe Gurdián y que'l matrimoniu de los sos padres
fuere un matrimoniu de comenencia. Galguiáu por esa circunstancia siempres tuvo
problemes pa rellacionase. Resultába-y doliosu y difícil d’esplicar, a l'alta
sociedá cola que se rellacionaba, los sos oríxenes.
Rubén Darío, que ñaciera en Metagalpa, güei ciudá Darío, el
18 de xineru de 1867, foi criáu polos sos tíos güelos. Por Félix, que yera
Coronel del exércitu, y por Bernarda, a los que consideraba los sos verdaderos
padres, pos apenes tuvo contactu cola so madre, que vivía n'Honduras, nin col
so padre, a quien llamaba "tíu Manuel". Foi educáu nos xesuites y,
anque sobre los sos caberos años hai poques noticies sábese qu'a la muerte del
coronel Félix Ramírez, la familia pasó apuros
económicos, ya inclusive pensaron colocar al mozu Rubén como aprendiz de
xastre.
Solu cuntaba catorce años cuando Rubén Darío quixo publicar
el so primer llibru, “Poesíes y artículos en prosa”, que nun sería publicáu
hasta'l cincuentenariu de la so muerte.
Darío llegare a España, n'avientu de 1.898, como
corresponsal del diariu arxentín La Nación, col compromisu d'unviar cuatro
cróniques mensuales. Tuvo un tiempu y coló pa volver en 1905, tamién como
corresponsal pero, al empar, como miembru d'una comisión nomada pol gobiernu nicaragüense
pa solventar una disputa territorial con Honduras. Esi añu publicó en Madrid el
terceru de los llibros de la so obra poética: “Cantares de vida y esperanza,
los cisnes y otros poemas”, editáu por Juan Ramón Jiménez.
Dempués de 1909, l'embaxador y poeta nun volvió per San Esteban
de Pravia. A finales de 1915, el mesmu añu en que salió a la lluz la so
Autobiografía, tornó a Nicaragua, según Paca Sánchez, engañáu. Sabía que diba
morrer. Si la vegada pasada díxivos hasta llueu agora dígovos hasta siempres,
dixo forzando la voz. Y en Nicaragua morrió, dempués d'una operación de fégadu,
el 6 de febreru de 1916. Los sos funerales duraron una selmana. Foi enterráu na
Catedral Metropolitana, la mesma na que fuere bautizáu.
No hay comentarios:
Publicar un comentario
Milio Mariño