El PSOE va discurrir nueves idees pero colos dirixentes de siempre

Milio Mariño

El PSOE entama güei un procesu de modernización programáticu que va desenvolvese a lo llargo del añu pa concluyir n'ochobre, con una gran Conferencia Política.

Anúncienlo como'l mayor procesu d'alderique, diálogu, participación, y actualización porque, ente los sos oxetivos, ta implicar al mayor númberu posible de persones y colectivos, y sumar idees y respuestes.

Coles mesmes va poner en marcha un gran espaciu de trabayu dixital na rede, que va tar abiertu a tola población, y va constituyise como una plataforma d'escucha activa, conversación y participación.

Depués de cinco millones de votos perdíos y de fracasar en práuticamente toles autonomíes, sacante Asturies, esi podría ser el camín pero naz galguiáu pola resistencia de los que lleven más de vente años en cargos de relevancia y nun tan dispuestos a dexalos y marchar pa casa.

El PSOE precisa una renovación d'idees pero, sobremanera, de persones. Les idees nun fueron les que fallaron, siguen siendo válides, los que fallaron fueron los dirixentes que nun supieron tar a l’altura de lo qu’esixe un partíu y un electoráu d'esquierdes.