Yeren tres osos y parió la güela

Milio Mariño

Esti domingu d’iviernu apetezme cuntar una hestoria un pocu más llarga de les qu’avezo a cuntavos. La hestoria de Paca y Tola, dos oses hermanes que tienen 24 años y va pa 4 que viven con Furaco, un osu enorme, de 302 quilos, diez años más xoven.

El matrimoniu a tres, ente osos, al paecer, ye llegal pos foi promovíu, en so día, polos Gobiernos d'Asturies y Cantabria, col propósitu de que les oses tuvieren descendencia. Quiero dicir que les autoridaes nun vieron escandalo nin yos importó que la edá de les oses fora, entós, l'equivalente a 67 años humanos. Les oses son fértiles tola vida y como a pesar de los munchos años entá nun probaren osu, unviáron-yos a Furaco, que según el presidente Revilla nun diba fallar pos venía alimentáu con anchoes y sobaos.

Tola y Furaco tuvieron cortexando un añu hasta que, el 3 de mayu de 2009, ficieron l’amor, momentu que foi recoyíu en delles fotografíes y espublizáu polos principales diarios del país. Ye más, según los testigos presenciales, l'actu prollongóse per espaciu de 20 minutos y l'osu, qu’acabó frayáu, a la fin dióse un bañu nel estanque mientres la osa valtóse plácidamente a folgar.

Aquel alcuentru valió pa pocu. Tola, que yera la prefería, nun quedó preñada y la so hermana Paca tampoco. Pero'l tríu siguió conviviendo, n'amor y harmonía, hasta que’l branu pasáu los cuidadores alvirtieron que Tola acoxaba de la pata drecha. Y, entós, foi anestesiada y sometía a un chequeu completu qu'incluyó radiografíes, una ecografía, una revisión del so aparatu xenital y amueses de sangre pa refugar problemes de fégadu o reñón.

El diagnósticu que dio’l vetrinariu foi que Tola yera como una güelina que precisaba bastón, por causa la edá y dellos problemes oseos, pero que taba bien de salú. Bárbaru, diría yo, yá que por aquelles feches, y ensin que naide lo alvirtiera, quedó preñada. Parió esti mes, fai unos díes, y la tristura d’esta hestoria ye que l'esbardu apaeció muertu, entá nun se sabe si de muerte natural o estrapáu ensin querer pola madre.

La tristura del desenllaz faise inda mayor cuando nos enteramos de que Tola pudo perder al so fíu porque les oses y l'osu nun recibíen la debida atención yá que'l so cuidador, que llevaba con elles 17 años, dexó de cuidales a finales del branu pasáu por aplicación d'un ERE que lu mandó pal paru.